是日，在商場food court吃飯，旁邊坐的是一對大叔大嬸夫婦。
大叔買了飯捧回來準備吃，大嬸開口了。
「無買嘢飲咩？」
「無呀，你想飲呀？」
「頭先又唔買。」
「而家買都得啦，俾錢啫。我去買啦，你想飲咩？」
幾分鐘之後，先生捧了一杯熱豆漿回來。
「點解唔買凍嘅？」
「你想飲凍嘅？」
「做咩你唔買凍嘅？」
大叔轉身去換一杯凍豆漿。大嬸依舊坐著等，一面唸著「點會買熱架？呢個天時梗係買凍架嘛。熱點飲…」
大叔回來，開始吃他的飯。大嬸的焗意粉還未做好。
「咁耐嘅？整咁耐...」
「整咁耐都未好，都未拎去焗…」
大叔吃了幾口飯。
「佢得個咁細個爐，睇下，都未擺入去焗…」
「你睇下佢整好未？」
大叔於是放下他的飯，去問店員。Food court的人很多，前面幾個都是pizza，看來焗飯焗意粉要再等上一等。
大嬸獨自在座位等著，仿佛又對自己說：
「早知道係屋企食啦，等咁耐。屋企食又幾廿蚊，呢度食又係幾廿蚊...」
大叔回來匯報：
「要等多陣喎，不如你食啲我個啲先啦？」
「無筷子無叉點食啫！頭先你又唔問佢拎！」
大叔於是去找了餐具回來。大嬸吃不了兩口，又不耐煩起來，又去檔口看看她的意粉做好了沒有。
失望而回，她的嘴邊依舊掛著：「整咁耐架…」
幾分鐘後，她的意粉終於送到面前，先生終於可以坐下來好好吃飯 - 至少可以安坐下來。
「你食唔食啲意粉？好漏，我實食唔晒。」
說罷她分了些意粉到大叔的碟中。
「你唔好食啲飯啦，幫我食啲意粉。」
吃畢，大嬸又加了句：
「我覺得佢啲汁整得唔好，茄汁唔夠。」
與此同時，我也吃飽了，還追加了一個甜品，非常滿足。
旁邊的對話，似曾相識。仔細想想，我也認識好幾個這位大嬸。我想說的不是港女最終都會變港嬸，挑剔不是女人的專利，男人也會。你要挑骨頭的話，身邊所有的人和事自然就會變得不順眼。而這種「沒有事情稱心」的觀感，會蔓延你生活每一個角落，人生就自然變得更不順意。
唯一慶幸的是，大嬸找到這樣一個事事遷就的丈夫，那怕在她心中，他仍是不合格的。
可是好老公有個壞處，因為大嬸永遠不會知道自己出了什麼問題，不會明白人生為什麼事事不如意，很可能也會問，為什麼我朋友哪麽少。
可能是我八卦了，只是我自己的體會，我會好好告誡自己，不要變一個大嬸呀（驚）！
